Félagslög stuðningsmannklúbbs knattspyrnudeildar Víkings 1. gr. Nafn og aðsetur Félagið ber nafnið Berserkir og hefur aðsetur í Víkinni, félagsheimili Víkings. 2. gr. Markmið Markmið stuðningsmannaklúbbsins eru að það verði eftirsóknarvert fyrir leikmenn að spila fyrir Víking, fyrir fólk að starfa fyrir Víking og fyrir stuðningsmenn að sækja leiki Víkings. Ennfremur er markmið að mynda sterkan kjarna í kringum knattspyrnudeildina sem gefur liðinu skemmtilegan svip og mætir á heima- og útileiki. 3. gr. Aðild Félagar geta orðið allir stuðningsmenn knattspyrnudeildar Víkings sem hafa áhuga á því að gera umgjörð leikja skemmtilega. Aðild er staðfest með félagsskírteini útgefnu af stjórn. Að sama skapi getur stjórn ógilt aðild ef félagi er talinn hafa brotið gegn háttsemisreglum eða aðild hans er ekki talin stuðningsmannaklúbbnum til góðs. Aðild og úrsögn skulu vera skrifleg. Félagsskrá skal vera opin félögum. Atkvæðisrétt á fundum félagsins hafa lögráða félagar. 4. gr. Háttsemi Aðili að stuðningsmannaklúbbi knattspyrnudeildar Víkings skal í hvívetna gæta þess að vera sjálfum sér og Víkingi til sóma 5. gr. Félagsgjöld Félagsjöldum skal stilla í hóf þannig að sem flestir geti orðið aðilar að klúbbnum. Stjórn skal í upphafi starfsárs ákveða félagsgjöld fyrir næsta tímabil. Ennfremur getur stjórn ákveðið að skipa félagsgjöldum og fríðindum þeim tengdum í fleiri flokka. 6. gr. Aðalfundur Aðalfund skal halda einu sinni á ári og skal stjórn kosinn á honum. Á aðalfundi skal stjórn birta skýrslu tímbailsins. Ennfremur skulu lagðar fram breytingar á félagslögum og önnur málefni löglega upp borin. Reikningar síðasta starfsárs skulu lagðir fram og skýrðir. Aðalfund skal boða tímanlega og með minnst 4 vikna fyrirvara. 7. gr. Aukaaðalfund Ef 20% skráðra félagsmanna óskar skal stjórn boða til aukaaðalfundar og skal um boðun hans fara eins og aðalfundar. Ef stjórn segir af sér, verður óstarfhæf af einhverjum sökum eða sinnir ekki skyldum sínum getur formaður knattspyrnudeildar Víkings boðað til aukaaðalfundar. 8. gr. Stjórn Stjórn skal skipa 5 félagsmönnum og mótar hún starf félagsins og skal fá félagsmenn sér til aðstoðar eins og þurfa þykir. Stjórnin skal á fyrsta fundi eftir kosningu skipta með sér verkum og velja formann, gjaldkera og ritara. Formaður er tengiliður við stjórn knattspyrnudeildar og talsmaður félagsins út á við. Hann boðar fundi. Gjaldkeri er jafnframt varaformaður og ábyrgur fyrir fjármálum félagsins, reikninga skal greiða með samþykki formanns. Ritari sér um að halda fundargerðir og gera þær aðgengilegar, jafnframt ber ritari ábyrgð á félagaskrá. Endurskoðendur reikninga skulu vera tveir og kosnir á aðalfundi. 9. gr. Félagsfundir Að jafnaði skulu félagsfundir haldnir einu sinni í mánuði yfir vetrartímann. Stefnt skal að því að skipulega sé staðið að samkomum fyrir hvern heimaleik. 10. gr. Fjárhagslegar skuldbindingar Stjórn eða öðrum félagsmönnum er óheimilt að stofna til beinna fjárskuldbindinga í nafni félagsins. Félagið getur tekið að sér verkefni en ætíð skal gert ráð fyrir að félagsgjöld og stuðningur fyrirtækja dugi fyrir þeim útgjöldum. 11. gr. Breytingar á lögum Breytingar á lögum þessum er einungis hægt að gera ef 2/3 hluta fundarmanna samþykkja þær. 12. gr. Slit félags Félaginu verður aðeins slitið á aðalfundi, sem sérstaklega hefur verið boðaður í því skyni og verður a.m.k. helmingur atkvæðisbærra félagsmanna að vera mættur og þrír fjórðu hlutar fundarmanna að samþykkja slit þess. Eignir félagsins skulu við slit þess renna til knattspyrnudeildar Víkings. Samþykkt á stofnfundi þann 30.04.2004.